Nenas e nenos cantan a Castelao, o 06 de xuño na Praza de Rafael Dieste - No bico un cantar 2025 - Concello de Rianxo

No bico un cantar 2025. Nenas e nenos cantan a Castelao.

O certame musical No bico un cantar, promovido polo Consello da Cultura Galega en colaboración coa Xunta de Galicia, celebra en 2025 a súa novena edición presencial. A cita será en Rianxo, vila natal de Castelao, a quen se lle rende homenaxe neste ano polo 75.º aniversario do seu pasamento en Bos Aires (7 de xaneiro de 1950).

Baixo a dirección do mestre Maximino Zumalave e co acompañamento do Quinteto de metais Hércules Brass, máis de cincocentas nenas e nenos darán vida a versos de grandes autores e autoras da literatura galega —desde Cabanillas ata a Xeración Nós—.

Participa alumnado dos conservatorios profesionais de música das sete cidades galegas, así como de centros da contorna de Rianxo. Este ano destaca tamén a colaboración especial do Instituto Arxentino Galego Santiago Apóstol de Bos Aires, nunha ponte musical que une Galicia e a Arxentina a través das voces infantís e da memoria de Castelao.

• DÍA: venres 06 de xuño
• HORA: 18:00
• LUGAR: Praza de Rafael Dieste

Máis información no sitio web do Consello da Cultura de Galicia.